Цар тахлын улмаас энэ жил тохиож буй Ардын хувьсгалын 100 жилийн ойг ирэх жил буюу 2022 онд нөхөж тэмдэглэх шийдвэрийг Засгийн газраас гаргасан. Харин Үндэсний их баяр наадмыг өдрийг тохиолдуулан бэлдсэн “Би Монгол хүн” цахим концерт ням гараг/2021.07.11/-ийн орой 17:00 цагт иргэдийг хүртээл болсон ч олон нийтийн сүлжээнд багагүй шүүмжлэл, маргааныг дагуулаад байна.
Тэгвэл Монгол Улсын Соёлын гавьяат зүтгэлтэн, сэтгүүлч Б.Галаарид уг концертын талаар өөрийн байр сууриа цахим хуудастаа илэрхийлжээ.
Тэрбээр “Төрийн наадам, гэрийн найр аль аль нь тогтсон ёстой, дэгтэй, соёлтой. Наадмын хагас галзуу клипийг хараад үнэхээр дур гутав. Хайран сайхан уран бүтээлчдийн маань хэдээр нь ч алиа салбадайн дүр бүтээлгэсэн юм? Дууны агуулга, утгыг яагаад бодолцоогүй юм? Хоёр жил дараалан согтуу монголын дүрээр бахархлаа. Тийм бахархалт сайхан юм мөн үү? Бөөлжүүлж харуулах л дутав. Архи уугаад хундагаа шидэж ч байх шиг, бүсгүй хүний хормой хот сөхөж ч байх шиг. Хаа байна, төрт ёс минь? Хаа байна, монгол өв соёл минь? Хэн гээч "мундаг" нь зөвлөсөн юм бол? Хэн гээч "мундаг" нь найруулсан юм бол? Уран сайхны хяналт энэ тэр гэж байгаагүй юм байх даа? Эцэст нь төрийн наадам, айлын найр хоёроо ч олигтойхон ялгаж салгаж ойлгодоггүй яамтайгаа ухаарлаа. Соёлын яамтай болоход нь алгаа ташин баяр хүргэсэн сэн. Солиотой клипийг нь хараад амаа барин гасаллаа. Ай халаг, эй нүдний булай гэж...” гэжээ.
