Жил бүрийн баяр наадмын үеэр иргэдийн амралт зугаалга эхэлсэнтэй холбогдуулан усны осол болон зам тээврийн осол ихээр гардаг. Үүнтэй холбогдуулан ЦЕГ болон ОБЕГ-ууд хамтран болзошгүй аюулаас урьдчилан сэргийлэх сануулгыг хүргэсээр байдаг атал энэ мэтийн ослууд гарч, иргэд амь насаа алдсаар байгаа нь харамсалтай.
Тэгвэл өнөөдрийн байдлаар /2021.07.15/ Онцгой байдлын ерөнхий газраас мэдээлснээр усанд осолдсон байж болзошгүй нийт ТАВАН иргэнийг эрэн хайх ажиллагаа үргэлжилж байгаа гэжээ.
Тодруулбал, энэ долдугаар сарын 4-нд Сэлэнгэ аймгийн Зүүнбүрэн сумын Бэлчир багийн “Сүмийн булан” гэдэг газарт “Сэлэнгэ” мөрний эрэг дээр 10 иргэн зугаалж байснаас тус аймгийн харьяат иргэн Д, Н нар суудлын автомашинтай сураггүй болсон бөгөөд “Сэлэнгэ” мөрөнд осолдсон байж болзошгүй тухай дуудлагыг энэ долдугаар сарын 9-ны өдрийн 15:09 цагт хүлээн авсан байна. Одоогоор тус аймгийн онцгой байдлын газрын эрэн хайх, аврах ангийнхан иргэн Н 50 настай эмэгтэйг эрэн хайх ажиллагааг одоог хүртэл зохион байгуулж байна.
Дархан-Уул аймгийн Дархан сумын 1 дүгээр багийн “Алтанхундагын тохой” гэдэг газар 17 хүн “Хараа” голын эрэгт зугаалж байснаас 1 хүн усанд сэлж байгаад живсэн тухай дуудлагыг долдугаар сарын 11-ны өдрийн 17:05 цагт хүлээн авчээ. Тус аймгийн Онцгой байдлын газрын алба хаагчид нийслэлийн Хан-Уул дүүргийн харьяат иргэн О 21 настай, эрэгтэйг эрэн хайх ажиллагааг зохион байгуулж одоог хүртэл эрэн хайж байгаа юм.
Баян-Өлгий аймгийн Цэнгэл сумын Бор бургас багийн “Бага түргэний хүрхрээ” гэдэг газар 12 хүн “Бага түргэний хүрхрээ”-нд зугаалж байснаас 1 хүн хүрхрээн дээрээс /22 метрийн өндөр/ хальтарч ус руу унаж, осолдсон тухай дуудлагыг долдугаар сарын 12-ны өдрийн 16:15 цагт хүлээн авч Орхон аймгийн харьяат иргэн Д 35 настай, эрэгтэйг эрэн хайх ажиллагааг хүч нэмэн зохион байгуулж байна.
Мөн энэ долдугаар сарын 12-ны өдөр Нийслэлийн Хан-Уул дүүргийн 12 дугаар хорооны “Задгай”-д 6 хүн Туул голын эрэг дээр зугаалж байснаас 1 хүн живсэн байж болзошгүй тухай дуудлагыг долдугаар сарын 13-ны өдрийн 22:00 цагт хүлээн авчээ. Уг дуудлагын дагуу Сонгинохайрхан дүүргийн 2 дугаар хорооны харьяат иргэн М 19 настай эрэгтэй архи согтууруулах ундаа хэтрүүлэн хэрэглэсэн үедээ алга болсон тул эрэн хайх ажиллагааг эхлүүлж, олдоогүй тул өнөөдөр 05:00 цагт дахин эхлүүлжээ.
Баянхонгор аймгийн Богд сумын Алтай багийн “Их богд” ууланд “Битүүтийн-Эх” гэдэг нууранд Нуурын эргээр морьтой 4 хүн явж байснаас 1 хүн морьтойгоо живсэн тухай дуудлагыг долдугаар сарын 14-ний өдрийн 23:50 цагт хүлээн авч, тус сумын харьяат иргэн Б 26 настай, эрэгтэйг морьтойгоо нууранд живсэн тул эрэн хайх ажиллагааг зохион байгуулахаар долдугаар сарын 15-ны өдрийн 05:20 цагт Богд сумын чиглэлд алба хаагчид зорьжээ.
 (2).jpg)
.jpg)
