АНУ-ын Калифорни дахь дээд зэрэглэлийн хоёр дэлгүүрт хулгайн гэмт хэрэг гарчээ. АНУ-ын зарим томоохон хотуудад үүнтэй төстэй гэмт хэрэг ихээр үйлдэгдэж байгаа аж. Цагдаагийн газрын (LAPD) мэдээлснээр лхагва гарагийн орой тав гаруй хүн Лос Анжелес хотын Канога цэцэрлэгт хүрээлэнгийн Нордстром дэлгүүрийг дээрэмджээ.
Халдлага орон нутгийн цагаар 18:45 цагийн орчимд болсон бөгөөд таван хүний бүрэлдэхүүнтэй бүлэг сэжигтэн дэлгүүрт орж ирээд 25,000 ам.долларын үнэтэй 7-8 ширхэг үнэтэй түрийвчтэй эд зүйлс авч явсан аж. Халдлагсад хулгай хийх үедээ хамгаалалтын ажилтан руу баавгайн шүршигч цацаж, автомашинаар хэргийн газрыг орхин явсан байна.
Мөн лхагва гарагт цагдаа нар Сан Франциско хотоос хойд зүгт 95 км-ийн зайд орших Санта Роза дахь Apple-ын дэлгүүрээс дөрвөн хүн 20,000 ам. долларын бараа хулгайлсан гэж мэдэгдэв.
Санта Розагийн цагдаагийн хэлтсийн мэдээлснээр энэ үйл явдал үд дундын үед үйлчлүүлэгчид болон ажилчдын нүдэн дээр болсон бөгөөд 14-18 насны дөрвөн дээрэмчин оролцсон гэж мэдэгдэв. Эдгээр тохиолдлууд нь Калифорни муж дахь дээд зэрэглэлийн дэлгүүрүүдийг онилсон бөгөөд үүнээс гадна хэд хэдэн хулгайч томоохон дэлгүүрүүдийг дээрэмдэн зугтсан байна.
Бас нэгэн хэрэг бямба гарагт Сан Франциско хотоос зүүн тийш 35 км-ийн зайд орших Волнат Крик дэх Нордстром их дэлгүүрт болсон бөгөөд 80 орчим хүний бүрэлдэхүүнтэй бүлэглэсэн зэвсэгтэй этгээдүүд дайрчээ. Одоогийн байдлаар дээрх этгээдүүдээс гурван сэжигтнийг баривчилсан байна. Тус этгээдүүдээс хулгайлсан эд хөрөнгийг хүлээн авсан ба дээрэм, зохион байгуулалттай жижиглэнгийн хулгай, хуйвалдаан зэрэг олон гэмт хэрэгт буруутгаад байна.
Мөн даваа гарагт Лос-Анжелес хотын Нордстром их дэлгүүрт 18 хүн нэвтэрч, олон мянган долларын үнэ бүхий бараа хулгайлсан байна. Цагдаа нар одоогоор гурван сэжигтнийг баривчилсан гэж мэдэгдэв. Сүүлийн үед муж даяар зохион байгуулалттай жижиглэн худалдааны хулгайн үйл ажиллагаа нэмэгдэж байгаатай холбогдуулан Калифорнийн амбан захирагч Гэвин Ньюсом Калифорнийн хурдны замын эргүүлд (CHP) томоохон жижиглэнгийн худалдааны газруудын ойролцоо цагдаагийн хамгаалалт нэмэгдүүлэхийг үүрэг болгож, жижиглэн худалдаатай тэмцэх зорилгоор 2022-2023 оны улсын төсөвийг нэмэхээр төлөвлөж байгаагаа зарлав.
