БНАСАУ-ын удирдагч Ким Жөн Ун “COVID-19”-өөр өвчлөөд эдгэрчээ. Энэ тухай түүний дүү, Солонгосын Хөдөлмөрийн намын (СХН) Төв Хорооны Суртал ухуулгын хэлтсийн орлогч дарга Ким Ё Жон мэдэгдсэн байна.
“Хэдийгээр тэрбээр хүнд өвдөж, өндөр халуурч байсан ч халдвартай тэмцэх энэ дайнд анхаарал халамж тавих ёстой ард түмнийхээ талаар ямагт бодож нэг минут ч хэвтэхийг өөртөө зөвшөөрөөгүй" гэж Ким Ё Жон мэдэгдсэн байна. Түүний мэдэгдлийг Солонгосын төв цахилгаан мэдээний агентлаг /KCNA/ нийтэлжээ. Ким Ё Жон хэлэхдээ, БНАСАУ-ын удирдагч нь шинэ төрлийн коронавирустэй тулгарсан олон арван сая умард солонгосчуудын нэг болсон гэжээ. Өмнө нь Ким Жөн Ун шуурхай арга хэмжээ авсны үр дүнд БНАСАУ-д “COVID-19”-ийг бүрэн ялсныг зарласан юм.
Эх сурвалж: Монцамэ агентлаг
