БНСУ-ын Чежү арлын далайн эргийн газар зугаалж явсан эмэгтэйн биед хүрээд зугтсан 30 гаруй насны Монгол эрэгтэйг баривчилсан хэрэг гарчээ.
Тодруулбал, Чежүгийн цагдаагийн газраас 30 гаруй насны Монгол эрэгтэйг эмэгтэй хүний биед хүчээр хүрсэн /танхайрсан/ хэргээр прокурорт шилжүүлсэн талаар өчигдөр /2022.09.15/ мэдээлжээ. Чежү хотод ажиллах виз авсан иргэн А нь өнгөрсөн сарын 14-ний өглөөний 06:20 цагт Чежү хотын Тап-донг дахь далайн эргийн замаар алхаж явахдаа 30 гаруй насны эмэгтэйн өгзөгт хүрч, зугтсан хэрэгт буруутгасан аж. Хохирогч тэр даруйд цагдаад мэдэгдсэн бөгөөд хэргийн газрын ойролцоох камерын бичлэгт шинжилгээ хийж Монгол эрэгтэйн зугтсан замыг тодорхойлж маргааш нь буюу наймдугаар сарын 15-ны өдөр Чежү хотын ** гэх компанийн гадаад иргэдийн дотуур байрнаас баривчилжээ. Хэрэгтэн гэх А нь мөрдөн байцаалтын явцад танхайрсан хэргийг үгүйсгэж “Би бүдэрч унах гэж байгаад санамсаргүй барьчихсан” хэмээн мэдүүлжээ.
Эх сурвалж: Newsis
