Улаанбаатар хотод автомашины дугаарын тэгш, сондгойгоор хөдөлгөөнд оролцуулсан эхний өдөр хөдөлгөөний эрчим 31 хувиар буурсан үзүүлэлт гарсан талаар Моноцамэ агентлаг мэдээлсэн байна. Замын хөдөлгөөний түгжрэл, ачааллыг бууруулах талаар авах зарим арга хэмжээний тухай захирамжийн хүрээнд 564 алба хаагч хоёр ээлжээр ажиллан, хөдөлгөөн зохион байгуулж байна. Олон нийтийн хөдөлгөөний ачаалал нэмэгдэж байгаатай холбогдуулан авто замын тэмдэг, тэмдэглэгээг шинэчлэх ажлыг эрчимжүүлж, төвийн зургаан дүүрэгт 86 гудамж, замд 74 999 ам метр тэмдэглэгээ хийхээс 69 гудамж, замд 54 813 ам метр хэвтээ тэмдэглэгээ хийжээ. Түүнчлэн, хотын гол дөрвөн өргөн чөлөө буюу Энхтайван, Чингис, Ард Аюуш, Чингэлтэйн өргөн чөлөөний хоёр эгнээ замыг гурав болгон нэмэгдүүлэх хүрээнд 4 өргөн чөлөөний нэгдүгээр эгнээний газрыг чөлөөлөхөд 195 нэгж талбар өртөх тооцоо судалгаа гарчээ.
