Архангай, Булган, Орхон, Төв аймгийн нутаг, Сэлэнгийн өмнөд хэсгээр, Өвөрхангайн хойд хэсгээр өнөө шөнө хөрсөн дээр -5 хэм давж цочир хүйтэрнэ гэж Цаг уур орчны хүрээлэнгээс анхаарууллаа.
Тодруулбал, өнөө маргаашдаа нутгийн хойд хэсгээр, энэ сарын 27-нд баруун аймгуудын нутгаар нойтон цас орох тул тариа, ногоо цасанд дарагдаж, хөрсөн дээр цочир хүйтэрч, замд халтиргаа гулгаа үүсэж болзошгүйг малчид, иргэд, хадланчид, тариаланчдад онцгойлон анхааруулж байна. 2023 оны 9 дүгээр сарын 27-ноос 10 дугаар сарын 1-нийг хүртэлх цаг агаарын урьдчилсан төлөв танилцуулж байна.
Энэ сарын 27-нд баруун аймгуудын ихэнх нутаг, төв болон зүүн аймгуудын нутгийн зарим газраар, 28-нд баруун аймгуудын нутгийн зүүн, төвийн аймгуудын ихэнх нутаг, зүүн аймгуудын нутгийн баруун хэсэг, говийн аймгуудын нутгийн зарим газраар, 29-нд төв болон говийн аймгуудын нутгийн зүүн хэсэг, зүүн аймгуудын нутгийн зарим газраар бороо, нойтон цас, цас орно. Салхи энэ сарын 27, 28-нд Алтайн салбар уулс болон говь, талын нутгаар түр зуур секундэд 16-18 метр хүрч шороон шуурга шуурна. Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө -8-13 градус хүйтэн, өдөртөө +0+5 градус дулаан, Хэнтийн уулархаг нутаг, Эг, Үүр, Тэрэлж голын хөндийгөөр -2-7 градус хүйтэн, өдөртөө +4+9 градус, говийн бүс нутгийн өмнөд хэсгээр шөнөдөө +3+8 градус, өдөртөө +14+19 градус дулаан, бусад нутгаар шөнөдөө -2+3 градус, өдөртөө +8+13 градус дулаан байна. 29-нд нутгийн баруун хагаст, 30-нд ихэнх нутгаар өдөртөө бага зэрэг дулаарах ажээ.
