БНСУ-ын залуу үеийнхэн Монголыг хамгийн их сонирхох болжээ

Үндэсний Статистикийн хорооны мэдээллээс харвал 2023 оны тавдугаар сард БНСУ-аас 7.2 мянган жуулчин ирж байсан бол энэ оны тавдугаар сард хоёр дахин нэмэгдэж, 14 мянга хүрчээ. Иймд өнгөрсөн оны үзүүлэлтийг давтах, эсвэл давах шинж ажиглагдаж байгаа юм.

Өнгөрсөн оны зунаас хойш БНСУ-ын алдартай жүжигчдийн оролцсон шоу, сошиал сүлжээнд олон дагагчтай инфлюенсерүүдийн контент хандалт сайтай байсны үр дүнд энэ онд солонгос жуулчдын тоо улам нэмэгдэх төлөвтэй байна. Мөн манай талаас ч тус улсын жуулчдыг татах хүчин чармайлт гаргаж, ялангуяа өвлийн аялал жуулчлалыг дэмжихэд чиглэсэн хөтөлбөрүүд зарлаад буй.

БНСУ-ын иргэдийн визийн чөлөөлөлтөөс гадна хоёр улс хоорондын нислэгийн давтамж, аяллын компаниудын багц үйлчилгээ гэсэн суурь хүчин зүйлс ч жуулчдын урсгалд нөлөөлж буй. Түүнчлэн 2023 оны VI-VIII сарын хооронд солонгос жуулчдын захиалсан Монголын аяллын багц хөтөлбөрийн тоо өмнөх оноос 284.3 хувиар өссөнийг “JoongAng Daily” сонин мэдээлжээ.

Зуны оргил саруудад Монголыг зорих БНСУ-ын зорчигчдын тоо нэмэгдэнэ гэж бид таамаглаж байна. Энэ хүрээнд нислэгийн тоогоо есдүгээр сарын 30-ныг хүртэл нэмэгдүүлж, долоо хоногт найман удаа нислэг үйлдэх төлөвлөгөөтэй байна. Солонгост ховор харагдах өргөн уудам тал нутаг, нуур, говь цөл зэрэг нь амгалан тайван, сэтгэл татам газруудыг хайх болсон Z үеийнхний анхаарлыг их татаж байгаа. Монголд ирсэн солонгос жуулчдын 20-30 хувь нь л дахин ирдэг болохыг өнгөрсөн онд Монголын Солонгос зах зээлийн аялал жуулчлалын холбооноос мэдээлж байжээ.