БНХАУ-ын өмнөд хэсэгт өчигдөр /2024.06.19/ орсон аадар борооны улмаас хөрсний гулгалт үүсэж, есөн хүн амь үрэгдэж, тариалангийн талбай, байшингууд усанд автан, 11 мянга гаруй хүнийг нүүлгэн шилжүүлжээ.
Түүнчлэн тус улсын өмнөд хэсгийн зарим тосгон цахилгаангүй болж, тариалангийн талбай бүхэлдээ шороонд дарагдаад байна. Мөн далайн эргийн Фужянь мужийн Вупинг хотод аадар борооны улмаас хөрсний гулгалт болж, дөрвөн хүн амиа алдаж, хоёр хүн сураггүй болохын зэрэгцээ 378 байшин нурж, 880 га (2,175 акр) тариалангийн талбай эвдэрч, Вупин хот 415 сая юань буюу 57.2 сая ам.доллар эдийн засгийн хохирол амссан гэж "Синьхуа" агентлаг мэдээллээ.
Мөн Хонконгтой хиллэдэг өмнөд хэсгийн Гуандун мужид болсон хөрсний гулгалтын улмаас Мэйжоу хотод таван хүн амь насаа алдаж, 15 хүн сураггүй алга болсон байна. Дээрх үерийн улмаас үүссэн нөхцөл байдалтай холбогдуулан гурван нисдэг тэрэг, 200 гаруй бүрэлдэхүүнтэй аврах баг иргэдийг эрэн хайх, аврах, гамшигт нэрвэгдсэн газруудад тусламж хүргэж ажлыг зохион байгуулж байгаа юм.
