Орхон аймгийн Баян-Өндөр сумын харьяат, Үндэсний бөхийн Улсын начин Ө.Батзул нь энэ оны долдугаар сарын 30-ны /2024.07.30/ өдөр зам тээврийн ослын улмаас амь насаа алдсан харамсалтай хэрэг гарсан билээ.
Талийгаач нь наймдугаар сарын 01 /2024.08.01/ өдөр болох байсан Эрдэнэт хот "Илгээлтийн эзэд" 50 жил, Хангайн бүсийн наадмын хүчит бөхийн барилдаанд оролцохоор нутгийнхаа зүг хүлгийн жолоо залж яваад зам тээврийн осолд өртөж, амь насаа алдсан байдаг.
"Тухайн үед тээврийн хэрэгсэл урсгал сөрсний улмаас зам тээврийн осол гарсан" гэдгийг албаныхан мэдээлж байсан бөгөөд уг хэргийг Орхон аймгийн Тээврийн цагдаагийн газраас шалгаж байсан юм. Улмаар тухайн ослын шүүх эмнэлгийн дүгнэлтүүд гараагүй зэрэг шалтгаанаар хэн нэгнийг тухайн хэрэгт яллагдагчаар татаагүй байв.
Тэгвэл шүүх шинжилгээний зэрэг холбогдох дүгнэлтүүд гарч, эсрэг урсгалд зорчиж явсан тээврийн хэрэгслийн жолоочийг тухайн ослын хэрэгт яллагдагчаар татаж, хэргийг шүүхэд шилжүүлэхээр прокурорт хүргүүлээд байгаа талаар эх сурвалж мэдээллээ.
Тодруулбал, тухайн жолоочийг Эрүүгийн хуулийн 27 дугаар зүйл буюу "Хөдөлгөөний аюулгүй байдал, тээврийн хэрэгслийн ашиглалтын журмын эсрэг" гэмт хэрэг үйлдсэн хэмээн яллагдагчаар татаж, хэргийг шүүхэд шилжүүлэх саналтайгаар прокурорт хүргүүлсэн аж.
Ташрамд өгүүлэхэд, Орхон аймгийн Баян-Өндөр сумын харьяат Ө.Батзул агсан нь 2016 онд Орхон аймгийн баяр наадамд зургаа давж, Аймгийн харцага цол хүртэж, 2020, 2021 онд Орхон аймгийн баяр наадамд түрүүлж байсан юм. Мөн Ардын хувьсгалын түүхт 100, 101 жилийн ойн наадмын хүчит 1024 бөхийн барилдаанд 14 бөх тав давж, улсын начин цол хүртэж байсан билээ.
Түүнчлэн 2008 оноос бөхийн спортоор хичээллэж эхэлсэн бөгөөд давхар чөлөөт бөхөөр хичээллэж Дэлхийн аваргын тэмцээнд Монгол Улсаа төлөөлөн оролцож байсан нэгэн юм.
Улсын начин Ө.Батзулын оролцохоор явж байхдаа осолдсон Эрдэнэт хот "Илгээлтийн эзэд" 50 жил, Хангайн бүсийн наадмын хүчит бөхийн барилдаанд Архангай аймгийн Хайрхан сумын харьяат аймгийн өсөх идэр начин О.Баярбаасан түрүүлсэн бөгөөд тэрбээр түрүү бөхийн бай шагналаа Улсын начин Ө.Батзул агсны гэр бүлд хандивлаж байв.
