Монголын үндэсний бөхийн холбооноос энэ сард зохион байгуулагдах барилдааны хуваарьт “Дорнын Хүчтэн” дэвжээний нэрэмжит Улс, аймгийн цолтой 128 бөхийн барилдаан багтсан.
Энэ сарын эхний барилдаан орон нутагт тэр дундаа Дорнод аймгийн Спорт хорооны зааланд дөрөвдүгээр сарын 1-д болсноороо онцлог боллоо. Барилдаанд Улсын аварга О.Хангай, Улсын заан Д.Анар, Б.Серик, Д.Хүдэрбулга, Б.Батмөнх, Улсын харцага Н.Золбоо, Ш.Пүрэвгарьд, Х.Бэгзсүрэн, Ц.Мөнхбаяр, Улсын начин Э.Сумьяабат, Х.Цогтгэрэл, Т.Дүгэрдорж, Б.Түмэндэмбэрэл нарын хүчит бөхчүүд зодоглов. Улсын цолтой 10 гаруй бөхчүүд барилдсан нь орон нутагт болж буй барилдааны чанар чансааг ахиулсанаас гадна үзэгч түмнээ баярлуулсан үйл явдал боллоо. “Дорнын Хүчтэн” дэвжээний барилдаанд Улсын аварга О.Хангай түрүүлж, Улсын заан Анар үзүүрлэсэн бол шөвгийн дөрөвт Улсын заан Б.Серик, Д.Хүдэрбулга нар үлджээ. Энэ барилдаан нь Монгол үндэсний бөхийн холбооноос зохион байгуулж буй энэ сарын хуваарьт барилдаанд орсоноороо онцлог болжээ. Мөн дөрөвдүгээр сарын бөхийн барилдаан орон нутгаас эхэлсэн нь нутгийн дэвжээний үйл ажиллагааг дэмжсэн арга хэмжээ болсон байна. Энэ сард үндэсний бөхийн холбооноос олон барилдааныг зохион байгуулах ба Улаанбаатар хотын аварга шалгаруулах Чансаа өндөр бөхчүүдийн 3х3 халз зэрэг барилдаанууд үзэгч түмнээ хүлээж байна.
Монголын Үндэсний бөхийн холбооноос Монгол бөхийн өргөөнд дөрөвдүгээр сард зохион байгуулах хүчит бөхийн барилдааны хуваарийг танилцуулж байна.
- 04.01-ний Мягмар гарагт Дорнод аймгийн Чойбалсан хотод болсон “Дорнын Хүчтэн” дэвжээний нэрэмжит Улс аймгийн цолтой 128 бөхийн барилдаанд Улсын аварга О.Хангай түрүүлж, Улсын заан Д.Анар үзүүрлэв.
- 04.05-ны Бямба гарагт Сумын цолтон болон залуу бөхчүүдийн ээлжит барилдаан,
- 04.06-ны Ням гарагт Сүхбаатар аймгийн Онгон сумын 100 жил, Улсын өсөх идэр харцага Дахын Одсүрэнгийн нэрэмжит улс аймгийн цолтой 128 бөхийн барилдаан,
- 04.12-ны Бямба гарагт Монгол улсын Ерөнхий сайд, Улсын хошой баатар, Маршал Х.Чойбалсангийн нэрэмжит улс аймгийн цолтой 128 бөхийн барилдаан,
- 04.19-ний Бямба гарагт “Хамбын бор”, “Урт гарт” хэмээх Монгол Улсын хүчит арслан Маамын Лхагвын нэрэмжит улс, аймаг, сумын цолтой хүчит 256 бөхийн барилдаан,
- 04.20-ны Ням гарагт Улаанбаатар хотын аварга шалгаруулах Чансаа өндөр бөхчүүдийн 3х3 халз барилдаан,
- 04.21-ний Даваа гарагт Завхан аймгийн Баянтэс сумын шинэ Спорт заалны нээлтийн барилдаан,
- 04.26-ны Бямба гарагт Нийслэлийн МАН-ын нэрэмжит Улсын аварга цолын хүндэтгэл улс, аймаг, цэргийн цолтой хүчит 128 бөхийн барилдаан,
- 04.27-ны Ням гарагт Улаанбаатар хотын аварга шалгаруулах Чансаа өндөр бөхчүүдийн 3х3 халз барилдаан тус тус зохион байгуулагдана.
