“The Wolf of Wall Street” киноны алдарт Lamborghini Countach автомашиныг Монголд авчиржээ

Кино урлаг, автомашины соёлын түүхэнд нэрээ үлдээсэн домогт Lamborghini Countach супер машин Улаанбаатарт буужээ.

1974-1990 онд үйлдвэрлэгдсэн Countach нь Lamborghini-ийн хамгийн алдартай загваруудын нэг бөгөөд хурц өнцөгтэй, шаантаг хэлбэрийн кузов, дээшээ сөхөгдөн онгойдог “хайчны” хаалгаар дэлхийд танигдсан. Уг загварыг Италийн алдарт дизайнер Марчелло Гандини зохион бүтээсэн бөгөөд дунд байрлалтай V12 хөдөлгүүр, арын хөтлөгчтэй хийцтэй юм.

Зурагт харагдаж буй улаан өнгийн Countach нь гадна хийцээрээ 1985-1988 онд үйлдвэрлэгдсэн 5000 Quattrovalvole буюу QV хувилбар юм. QV нь 5.2 литрийн V12 хөдөлгүүртэй бөгөөд тухайн үеийн супер машинуудын дундаас онцгой үзүүлэлттэй загварт тооцогдож байв.

Countach загвар нь зөвхөн хурд, дизайнаас гадна “The Cannonball Run”, “Cannonball Run II”, “Miami Vice” зэрэг бүтээлүүдэд гарч, 2013 оны “The Wolf of Wall Street” киноны алдартай хэсгээр шинэ үеийн үзэгчдэд дахин танигдсан юм. Ялангуяа “The Wolf of Wall Street” кинонд гардаг цагаан Countach-ийн дүр зураг автомашины киноны хамгийн алдартай хэсгүүдийн нэг болсон бол “The Cannonball Run”-д гарсан Countach нь загварынхаа кино урлаг дахь нэр хүндийг улам өсгөсөн байдаг.

“The Wolf of Wall Street” (2013)

Энэхүү олон жилийн түүхтэй, дэлхий даяар домог болсон Countach Монголын автомашины зах зээлд орж ирсэн нь хуучны сонгодог супер машинуудын эрэлт, цуглуулгын соёл манай улсад ч нэмэгдэж буйн нэгэн жишээ болж байна.

Эх сурвалж: UScars Mn