Испанийн нийслэл Мадрид хотоос өмнө зүгт өндөр хурдны хоёр галт тэрэг мөргөлдсөний улмаас 68 хүн амиа алдаж, олон арван хүн гэмтэж бэртжээ. Ослын улмаас зарим галт тэрэгний вагон төмөр замаас гарч, далангийн доош унасан бөгөөд аврах ажиллагаа үргэлжилж байна.
Орон нутгийн Кастилья-Ла Манча мужийн эрх баригчдын мэдээлснээр, осол аравдугаар сарын 28-ны өглөөний 09:00 цагийн орчимд Толедо мужийн Урда хотын ойролцоо болжээ. Тухайн үед хоёр галт тэрэгт 540 гаруй зорчигч байжээ. Ослын улмаас 80 хүн гэмтэж, тэдний 15-ынх нь биеийн байдал хүнд байгаа талаар Ройтерс агентлаг мэдээлжээ. Эрх баригчид сүйрсэн вагоны үлдэгдэл дундаас хохирогчдыг эрэн хайх ажиллагааг үргэлжлүүлж байгаа бөгөөд амь үрэгдэгсдийн тоо нэмэгдэх эрсдэлтэй байна.
Урьдчилсан мэдээллээр, төрийн өмчит Renfe компанийн өндөр хурдны галт тэрэг хувийн хэвшлийн Iryo компанийн галт тэрэгний араас мөргөсөн байна. Iryo компанийн галт тэрэг тухайн үед төмөр зам дээр зогсож байжээ. Мөргөлдөөний улмаас Iryo галт тэрэгний хоёр вагон замаас гарч, далангийн доош унасан талаар эх сурвалжууд мэдээлсэн байна.
Испанийн Тээврийн сайд Оскар Пуэнтегийн тайлбарласнаар, төмөр замын хөдөлгөөнийг удирдах автомат системд техникийн саатал гарсны улмаас 69 километр орчим урт хэсэгт галт тэрэгний хөдөлгөөн зогсжээ. Гэвч систем бүрэн хэвийн болоогүй байхад хөдөлгөөнийг сэргээх шийдвэр гаргаж, Renfe компанийн галт тэргийг үргэлжлүүлэн явахыг зөвшөөрсөн байна. Улмаар уг галт тэрэг зогсож байсан Iryo галт тэрэгтэй мөргөлджээ.
_2214.jpg)
