Ерөнхий сайд асан С.Баяр нарын долоон хүнд холбогдох Эрүүгийн хэргийн анхан шатны шүүх хурал өнөөдөр товлогдсон ч шүүгдэгчийн биеийн байдлаас шалтгаалан хойшиллоо. Тодруулбал, шүүгдэгч С.Баярын биеийн байдал тааруу түүнийгээ эмчийн бичгээр баталгаажуулсан байна.
Шүүх хурал зургадугаар сарын 15-ны өдөр товлогдсон юм. Нийслэлийн прокуророос Эрүүгийн хуулийн 263 дугаар зүйл /Төрийн албан тушаалтан албаны эрх мэдэл буюу албан тушаалын байдлаа урвуулах/-ийн 263.2 /Энэ хэргийг давтан үйлдсэн,уг хэргийн улмаас их хэмжээний хохирол, хүнд хор уршиг учирсан бол тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хасч хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгэнэ./,
Эрүүгийн хуулийн 18.6 /Мөнгө угаах/-ийн 2.3 /Албан тушаалтан албаны чиг үүрэг, бүрэн эрх, нөлөөг урвуулан ашиглаж үйлдсэн бол нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.
22.10 /Үндэслэлгүйгээр хөрөнгөжих/-ийн 1 /Нийтийн албан тушаалтан өөрийн хөрөнгө, орлого их хэмжээгээр нэмэгдсэн нь хууль ёсны болохыг үндэслэлтэй тайлбарлаж чадаагүй бол үндэслэлгүйгээр нэмэгдсэн хөрөнгө, орлогыг хурааж, нийтийн албанд томилогдох эрхийг хоёр жил хүртэл хугацаагаар хасаж хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ. Тус тус зааснаар яллах дүгнэлт үйлдэж шүүхэд шилжүүлсэн юм.
