Засгийн газраас хэрэгжүүлж байгаа томоохон төслийн нэг болох Зүүнбаян-Ханги мандлын төмөр замын бүтээн байгуулалт энэ онд эхэлнэ. Бүтээн байгуулалтыг энэ сарын 11-ны өдөр эхлүүлэх бөгөөд нээлтийн үйл ажиллагаанд Ерөнхий сайд Л.Оюун-Эрдэнийг оролцоно гэх мэдээлэл байна.
Зүүнбаян-Ханги чиглэлийн төмөр зам барьснаар уул уурхайн бүтээгдэхүүнийг гадаад зах зээл дээр гаргах бас нэгэн гарц нээгдэх төдийгүй бүс нутгийн хөгжилд ч бодит хувь нэмэр оруулна. Тус зам 216 км урт үргэлжлэх бөгөөд Ханги боомтоос Дорноговиор дамжиж БНХАУ-руу уул, уурхайн бүтээгдэхийг экспортлох юм.
Эл бүтээн байгуулалт эхэлснээр Зүүнбаян өртөө өргөжин тэлж цаашдаа хөдөлгөөн зохион байгуулах, вагон үзэх, зам засварын зэрэг олон тоо нэмэгдэх төлөвлөлтийг албаныхан хийжээ.
Тавантолгой-Зүүнбаян, Зүүнбаян-Ханги чиглэлийн төмөр замын бүтээн байгуулалт өрнөснөөр нийт 1970 хүн амтай Зүүнбаян тосгон дахин сэргэн мандах боломжтой болсон байна.