Сүүлийн өдрүүдэд Өвөрхангай аймгийн нутаг дэвсгэрт цас их хэмжээгээр орж, баруун сумдаар 40-70 см, төвийн болон говийн сумдаар 15-30 см, зүүн сумдаар 5-8 см зузаан цасан бүрхүүл тогтсон байна.
Дөрөвдүгээр сарын 14-ний цасан шуурганаар Тарагт суманд малдаа явж байсан гурван хүн сураггүй болсныг 15-ны өглөө гэрийн ойролцоох саравчнаас олсон бол, Баянгол сумын нэг иргэн гэрээсээ гарч сураггүй болсныг 15-ны өдөр айлаас олж, амь, эрүүл мэндийг нь авран хамгаалжээ. Мөн 4 дүгээр сарын 14-нд Улаанбаатар хотоос Баянхонгор аймаг руу тэмцээнд оролцохоор явсан 23 хүүхэдтэй бага оврын автобус Хайрхандулаан сумын нутагт замаасаа гарч, хээр суусныг аймгийн ОБГ-ын алба хаагчид дуудлагаар очин тусламж үзүүлж, Нарийнтээл суманд хүргэж өгчээ. Арвайхээрээс Баянхонгор чиглэл рүү цас ихээр орсны улмаас 140 зорчигчтой 47 автомашин цасанд суусныг гаргаж, замыг чөлөөлсөн байна.
