Олон улсын агаарын тээврийн зорчигчид удахгүй АНУ-д нэвтрэхдээ Ковидын вакцин хийлгэсэн эсэхээ нотлох шаардлагагүй болно гэж Цагаан ордоноос Даваа гарагт /2023.05.01/ хийсэн мэдэгдэлд дурджээ.
Тодруулбал, тавдугаар сарын 11-ны /2023.05.11/ өдрөөс эхлэн АНУ коронавирусийн улмаас үүссэн нийгмийн эрүүл мэндийн онц байдлын хугацаа дуусаж байгаа тул уг шаардлагыг цуцална гэлээ. Мөн холбооны ажилтнууд болон гэрээлэгч нарт вакцинжуулалтын дүрмийг цуцлах юм. Цуцалсан хязгаарлалт нь хуурай газрын боомт, гатлага онгоцоор АНУ-д нэвтэрч буй аялагчдад хамаарна.
Тус улс нь цар тахлын эсрэг аялал жуулчлалын хязгаарлалт хэвээр байгаа цөөхөн хэдэн орны нэг юм.
Энэхүү өөрчлөлт нь Сербийн теннисчин, 35 настай Новак Жоковичийг энэ жил АНУ-ын нээлттэй тэмцээнд тоглох боломжийг олгох юм. "Их дуулга"-ын 22 удаагийн аварга вакцинд хамрагдаагүй тул өнгөрсөн жилийн тэмцээнийг өнжихөөс өөр аргагүй болсон. Тэрбээр 2022 онд Австралийн нээлттэй тэмцээнд үүнтэй төстэй асуудалтай тулгарсан бөгөөд аварга цолоо хамгаалах боломж олдохоос нь өмнө түүнийг вакцинжуулалтын статусын улмаас албадан гаргасан юм.
