УИХ-ын Үйлдвэржилтийн бодлогын байнгын хороо намрын ээлжит чуулганы хугацаанд хийсэн ажлын тайлангаа танилцуулсан хэвлэлийн бага хурлыг өчигдөр Төрийн ордонд хийх үеэрээ байнгын хорооны дарга Г.Ганболд тус хороо УИХ-ын хяналт шалгалтын чиг үүргийг хэрэгжүүлэх чиглэлд түлхүү анхаарч ажилласан хэмээлээ.
Тус байнгын хороо 8 удаа хуралдаж, хуулийн 1, байнгын хорооны 5 тогтоолын төсөл дээр ажиллан, хяналт шалгалтын 6 тайлан, яам, агентлагийн 4 мэдээллийг хэлэлцэн шийдвэрлэжээ. Байнгын хорооны эрхлэх асуудлын хүрээнд УИХ-ын даргын захирамжаар байгуулсан Хөдөө аж ахуйн гаралтай бараа, түүхий эдийн биржийн тухай хуулийн шинэчилсэн найруулгын төслийг боловсруулах үүрэг бүхий ажлын хэсэг ажиллаж байна. Ажлын хэсгийг УИХ-ын гишүүн Ж.Бат-Эрдэнэ ахалж, Т.Аубакир, Ж.Батжаргал, Г.Тэмүүлэн, С.Чинзориг нар гишүүнээр нь ажиллаж байгаа аж.
Ажлын хэсгийн ахлагч Ж.Бат-Эрдэнэ хэвлэлийн бага хурлын үеэр хийсэн мэдээлэлдээ, Хөдөө аж ахуйн бирж одоо хүчин төгөлдөр мөрдөгдөж байгаа хуулийн хүрээнд бүрэн утгаараа ажиллаж чадахгүй байгаа, зөвхөн ченжүүдийн цуглуулсан түүхий эдэд хил гаалиар гаргах зөвшөөрлийн бичиг олгож, хураамж авах ажил хийж байна гэсэн юм. Тэрбээр, хуулийн шинэчилсэн найруулгын төсөлд тус бирж дээр хөдөө аж ахуйн гаралтай бараа, түүхий эдийн арилжаа бодитойгоор ил тод, нээлттэй явагддаг байх, мөн улсын хэмжээнд бүх суманд биржийн салбар ажиллаж байх зохицуулалтыг төлөвлөж байна хэмээн ярив.
Үйлдвэржилтийн бодлогын байнгын хороо өнгөрөгч онд байгуулж ажиллуулсан Улаанбаатар хот, орон нутагт хялгас ялгахаас дээш боловсруулалт хийх үйлдвэрүүдийн хүчин чадал, суурилагдсан тоног төхөөрөмжийн талаар хяналт шалгалт хийх үүрэг бүхий ажлын хэсгийнхээ тайланг хэлэлцээд, “Засгийн газарт чиглэл” өгөх тухай байнгын хорооны өнгөрсөн оны 07 дугаар тогтоолыг баталсан байна. Уг тогтоолоор дэлхийн зах зээл дээр ноос ноолуурын салбарын өрсөлдөх чадварыг нэмэгдүүлэх, ноос ноолуурын боловсруулах салбарын технологи хөгжүүлэлт, хүний нөөцийг бэлтгэх, төр хувийн хэвшлийн түншлэлийг хөгжүүлэх арга хэмжээ авч ажиллахыг Засгийн газарт чиглэл болгожээ.
Мөн Тавантолгой-Гашуунсухайт, Тавантолгой-Зүүнбаян чиглэлийн төмөр замын бүтээн байгуулалтад зарцуулсан хөрөнгө, үр дүнгийн талаарх Үндэсний аудитын газрын тайланг хэлэлцэж, “Засгийн газарт чиглэл” өгөх тухай байнгын хорооны өнгөрсөн оны 08 дугаар тогтоолыг баталсан байна. Тогтоолд төрөөс төмөр замын талаар баримтлах бодлогыг шинэчлэн боловсруулах ажлын хэсгийг байгуулах, хил холболтын ажлыг эрчимжүүлэх, төмөр замын бүтээн байгуулалтын ажилд оролцсон аж ахуйн нэгжүүдийн өр төлбөрийг барагдуулах зэрэг асуудыг тусгасан аж.
УИХ-ын байнгын хороод эрхлэх асуудлын хүрээний салбар, байгууллагууд, холбогдох асуудлын талаар мэдээлэл тайлан сонсож, шаардлагатай тохиолдолд Засгийн газарт чиглэл өгч ажилладаг. Үйлдвэржилтийн бодлогын байнгын хороо намрын ээлжит чуулганы хугацаанд Уул уурхайн бүтээгдэхүүний биржийн тухай хуулийн хэрэгжилт, биржээр арилжаалах уул уурхайн бүтээгдэхүүний экспортыг нэмэгдүүлэх, Жижиг, дунд үйлдвэрийг дэмжих төрийн санхүүгийн бүтцийг оновчтой болгох, зах зээлийг тэлэх, борлуулалтыг нэмэгдүүлэх, дотоодын сүү, сүүний бүтээгдэхүүний үйлдвэрлэлийг дэмжих, борлуулалтын тогтолцоог төлөвшүүлэх, урамшуулал олгох хугацааг сунгах, газрын тос боловсруулах үйлдвэр, Дархан арьс ширний цогцолбор, Эмээлт эко аж үйлдвэрийн болон Шинэ Ховд үйлдвэрлэл, технологийн паркын бүтээн байгуулалтын ажлыг эрчимжүүлэх чиглэлээр Засгийн газарт чиглэл өгсөн 2022 оны 05, 07, 08 дугаар, 2023 оны 01, 03, 04 дүгээр тогтоолынхаа хэрэгжилтийн талаарх мэдээллийг сонссон байна.
Эдгээр асуудлаар тулгамдаж байгаа бэрхшээлийг шийдвэрлэж, гацааг арилгах, зохион байгуулалтыг сайжруулах, хууль тогтоомж, шийдвэрийн хэрэгжилтийг эрчимжүүлэх, шаардлагатай тохиолдолд эрх зүйн орчныг сайжруулах талаар санал болосруулах чиглэлээр тодорхой үүрэг чиглэлийг Засгийн газар болон холбогдох байгууллагад өгчээ.
