Хуваарийн дагуу долоо хоног бүрийн даваа гарагт УИХ дахь намын бүлгүүд хуралдаж энэ долоо хоногт байнгын хороо, чуулганы хуралдаанаар хэлэлцэх асуудлаар байр сууриа нэгтгэдэг юм.
Тэгвэл Ардчилсан намын бүлэг хуралдаж, хуралдаанаас гарсан шийдвэрийг танилцуулж байна. Өнгөрсөн долоо хоногт хүүхдийн эрх зөрчигдсөн хэд, хэдэн гэмт хэрэг гарсан. Тухайлбал, Сэлэнгэ аймагт цагдаагийн нэр бүхий дөрвөн алба хаагч 13 настай охиныг хүчиндсэн хэрэг олон нийтэд ил болж сэжигтнүүдийг цагдан хориод байна. Мөн Баянгол дүүргийн 309 дүгээр цэцэрлэгийн багш хоёр настай хүүхдүүдийг хүлж зодсон хэрэг гарсан юм.
Тэгвэл дээрх буруутай этгээдүүдэд заавал хариуцлага тооцож, цаашид ийм гэмт хэрэг гаргахгүйн тулд бүх шатанд ажиллах ёстой гэх байр, суурийг Ардчилсан намын бүлгээс илэрхийллээ. Энэ мэт хүний эрхийг хангадаггүй, хууль зөрчдөг зэрэг асуудлаас үүдэн Засгийн газар ёс зүйн хариуцлага хүлээн огцрох ёстой гэлээ.
Тухайлбал, УИХ-ын гишүүн Д.Ганбат: -Ардчилсан нам 2016-2020 онд ажиллахдаа гэрч, хохирогчийг хамгаалдагТахрын албыг байгуулж байсан. Гэтэл Засгийн газар энэ албыг маш яаралтай татан буулгасан. Цагдаа нарыг нь Авлигатай тэмцэх газраас шалгаж байна. Засгийн газрын харьяалалтай хоёр байгууллага бие биенээ шалгаж байна. Тэгэхээр ашиг сонирхлын зөрчилтэй. Нөгөө талаараа, өмнө нь 16-18 наснаас доош хүүхдүүдийг бага насны хүүхэд гэж нэрлэдэг байсан бол 2017 онд хуульд өөрчлөлт оруулж, эрх баригч намынхан 14 нас болгож, багасгасан. Хүүхдийн эрх ашиг хаана байна вэ. Зүгээр нэг байгууллагын эрх ашиг яриад сууж байдаг. Одоо улс төр болон ёс зүйн хариуцлага хүлээдэг албан тушаалтан алга. Үндсэн хуулийн өөрчлөлтийг хууль ёсоор хийгээгүй. Хууль тогтоодоггүй байгууллагаар хууль тогтоолгож, УИХ-ын гишүүн Засгийн газрын гишүүн байх заалтыг тусгасан. Тийм учраас УИХ нь Засгийн газартаа хяналт тавих ямар ч боломжгүй болгосон. Мөн УИХ-д дахин сонгогдохоо бодож, бүгд хөдөө орон нутгаар явж байна. Ардчилсан намын бүлэг хуралдаж, энэ бүх асуудлыг ярилцаж, ажлын хэсэг байгууллаа. Бид эргээд энэ талаар мэдээлж, хууль эрх зүйн орчныг өөрчлөх талаар мэдээлнэ. Уг нь Засгийн газар бүрэн бүрэлдэхүүнээрээ огцрох ёстой. Монголчуудын 30 хувь нь ядуу амьдралтай, залуус нь харь орон руу ажиллахаар явж байгаа дүр зурагтай байгаа нь үнэн гэв.
УИХ-ын гишүүн С.Одонтуяа: -Хүчирхийлэлд өртсөн бага насны охины ар гэр нь цагдаагийн байгууллагаас тусламж хүссэн байдаг. Тусламж хүссэн байхад туслах үүргээ гүйцэтгэхийн оронд өөрт байгаа мэдээллийг буруугаар ашиглаж, жигшүүрт хэргийг үйлдсэн нь маш ноцтой асуудал. Гэр бүлийнхэн нь тусламж гуйж байхад тухайн алба хаагч бусад цагдаа нараа дуудан хэргийг үйлдсэн гэх мэдээлэл байгаа. Ард иргэдийг цагдаа хамгаалахгүй хэн хамгаалах юм бэ. Манай бүлгийн ажлын хэсэг энэ хэрэг дээр ажиллахаас илүү яагаад ийм гэмт хэрэг гарав, төрийн албаны боловсон хүчний бодлого алдагдав уу, хүний эрхийн талаар сургалтад хамрагдаж байна уу, цаашид ийм хэрэг гарахгүй байхад анхаарч ажиллана. Тийм учраас Тусгай хяналтын дэд хорооны дарга, УИХ-ын гишүүн Д.Ганбатаар ахлуулж ажиллаж байна. Бид дахин ийм хэрэг гаргуулахгүй байх тал дээр ажиллана гэсэн юм.
Мөн Хяналт шалгалтын тухай хуулийг 2010 оны парламентаар хэлэлцэж, Үндсэн хуульд 2019 онд нэмэлт өөрчлөлт орсноор хэрэгжиж байгаа. Нийт ард түмний мэдэх эрхийг хангаж хэд хэдэн нээлттэй сонсголыг зохион байгуулсан. Тухайн хуулийн сонсголыг тэргүүлж байгаа сайд нараа томилж, ашиг сонирхлын зөрчил байна уу, гэрч оролцож байна уу гэх мэт сонсголын үр дүн хүлээлтэд хүрсэнгүй гэж тус бүлгээс мэдэгдлээ.
