АНУ-ын Ерөнхий прокурор Пам Бонди холбооны прокуроруудыг мэндийн даатгалын "UnitedHealthcare" компанийн гүйцэтгэх захирал Брайан Томпсоныг хөнөөсөн хэрэгт сэжиглэгдэж буй Луижи Мангионед цаазаар авах ял оноохыг даалгажээ. Пам Бонди энэ хэргийг “эртнээс төлөвлөсөн, хүйтэн цуст аллага” гэж тодорхойлсон байна.
Тодруулбал, 2024 оны арванхоёрдугаар сарын 4-ны өдөр "UnitedHealthcare" компанийн гүйцэтгэх захирал Брайан Томпсон Нью-Йорк хотын Манхэттэн дүүргийн зочид буудлын гадна буудуулж амиа алдсан юм. Харин тус хэргийн сэжигтэн Луижи Мангионе 26 настай, Айви Лигийн их сургуулийг төгссөн, Мэрилэнд мужийн нөлөө бүхий гэр бүлээс гаралтай нэгэн юм. Тэрээр Пенсильвани мужийн Алтуна хотын McDonald’s түргэн хоолны газраас баривчлагдсан бөгөөд тухайн үед 3D принтерээр хийсэн гар буу, дуу намсгагч, эрүүл мэндийн даатгалын салбарыг шүүмжилсэн гар бичмэлтэй байсан гэдэг.
Харин АНУ-ын ерөнхийлөгч Д.Трамп албан тушаалдаа эргэн орсноос хойш холбооны түвшний цаазаар авах ялыг сэргээхээ мэдэгдсэн бөгөөд энэ хэрэг нь түүний гэмт хэрэгтэй тэмцэх бодлогын хүрээнд анхаарал татаж байгаа юм. Харин өдгөө Луижи Мангионе Нью-Йорк дахь холбооны шоронд хоригдож байгаа бөгөөд шүүх хурал нь ойрын хугацаанд товлогдох юм. Иймд тус хэрэг нь АНУ-ын шүүхийн тогтолцооны анхаарлын төвд байна.
Эх сурвалж: BBC
