АНУ-ын Ерөнхийлөгч Д.Трамп өчигдөр /2025.04.02/ Цагаан ордны "Сарнай" цэцэрлэгт болсон ёслолын арга хэмжээний үеэр “Эдийн засгийн тусгаар тогтнолын тунхаглал” хэмээх худалдааны шинэ бодлогоо танилцууллаа. Энэхүү бодлогын хүрээнд АНУ нь бүх импортын бараанд 10 хувийн суурь тариф ногдуулахаар болсон бөгөөд зарим орнуудын хувьд энэ тариф илүү өндөр байх ажээ.
Тодруулбал,
- Европын холбоонд 20 хувийн тариф ногдуулна бол
- Японд 24 хувийн тариф
- Өмнөд Солонгост 20 хувийн тариф
- Вьетнамд 46 хувийн тариф
- Тайваньд 32 хувийн тариф
- Камбожид 49 хувийн тариф
- Энэтхэгт 26 хувийн тариф
- Израильд 17 хувийн тариф
Мөн бүх автомашины импортод 25 хувийн тариф ногдуулахаар болсон байна. АНУ-ын ерөнхийлөгч Д.Трампын хэлснээр, "энэхүү арга хэмжээ нь АНУ-ын эдийн засгийн тусгаар тогтнолыг хангах, дотоодын үйлдвэрлэлийг сэргээх, шударга бус худалдааны практикийг зогсоох зорилготой" аж. Тэрээр АНУ-ын ган, автомашины үйлдвэрлэл зэрэг салбарууд гадаадын шударга бус худалдааны улмаас хохирол амссан гэж үзжээ.
Гэсэн хэдий ч, эдийн засагчид болон бизнесийн удирдагчид энэхүү тарифууд нь АНУ-ын хэрэглэгчдэд үнэ өсөх, инфляци нэмэгдэх зэрэг сөрөг нөлөө үзүүлж болзошгүйг анхааруулж байна. АНУ-ын Худалдааны танхимын зүгээс эдгээр тарифууд нь эцсийн дүндээ АНУ-ын хэрэглэгчдэд татвар болж ирнэ гэж мэдэгджээ.
Харин одоогийн байдлаар Монгол Улсын бараа бүтээгдэхүүнд тусгайлан 10 хувийн тариф ногдуулсан талаар мэдээлэл байхгүй ч АНУ импортын бүх бараанд 10 хувийн суурь тариф үйлчлэх тул үүнд нь монголын экспортлогчид хамаарах юм.
АНУ-ын ерөнхийлөгч Д.Трампын энэхүү худалдааны шинэ бодлого нь олон улсын худалдааны харилцаанд томоохон өөрчлөлт авчрах төлөвтэй байгаа юм. Олон улс орнууд АНУ-ын энэ шийдвэрт хэрхэн хариу үйлдэл үзүүлэх нь анхаарал татаж байна.
Эх сурвалж: New York Post
