Цахилгаан автомашин үйлдвэрлэгч Tesla компанийн захирлуудын зөвлөл гүйцэтгэх захирал Элон Маскийн залгамжлагчийг эрэлхийлж эхэлсэн тухай The Wall Street Journal мэдээлжээ.
Эх сурвалжийн мэдээлснээр, Tesla-ийн төлөөлөн удирдах зөвлөлөөс хэд хэдэн гүйцэтгэх захирлын ажлын байраар хангадаг компаниудтай холбогдож, И.Маскийн орлох боломжтой хүнийг хайж эхэлжээ. Энэ нь Элон Маск АНУ-ын Засгийн газрын үр ашигтай байдлын хэлтэст хэт их цаг зарцуулж, Tesla-д хангалттай анхаарал хандуулахгүй байгаа явдалтай холбоотой гэж мэдээлсэн байна. Иймд Tesla-ийн төлөөлөн удирдах зөвлөлийн гишүүд энэхүү нөхцөл байдалд сэтгэл дундуур байгаагаа илэрхийлжээ.
Э.Маск АНУ-ын Засгийн газрын үр ашигтай байдлын хэлтэст ажиллах болсон нь Tesla компанийн хувьд амаргүй үеийн эхлэлтэй давхацсан. Тодруулбал, 4 дүгээр сарын 22-нд нийтэлсэн компанийн эхний улирлын санхүүгийн тайлангаар цэвэр ашиг нь өнгөрсөн оны мөн үетэй харьцуулахад 71 хувиар буурсан үзүүлэлттэй гарсан байна.
Энэхүү тайлан нийтлэгдсэн өдөр Э.Маск энэ сараас эхлэн АНУ-ын Засгийн газарт зарцуулж буй цагаа эрс багасгаж, үндсэн бизнесүүддээ илүү төвлөрөхөө амласан байна.
Тэгвэл The Wall Street Journal-ийн нийтлэл гарсны дараа Э.Маск өөрийн X хуудсаараа дамжуулан уг мэдээллийг үгүйсгэж, “The Wall Street Journal сэтгүүл зүйг гутааж байна” хэмээн мэдэгдсэн байна. Харин одоогоор Tesla компанийн зүгээс албан ёсны тайлбар хийгээгүй байна.
Эх сурвалж: BBC
