Бүгд Найрамдах Солонгос Улсын Ерөнхийлөгч Ли Жэ Мён Турк улсад болсон НАТО-гийн дээд хэмжээний уулзалтад оролцож, батлан хамгаалах салбарын хамтын ажиллагааг өргөжүүлэх асуудлыг хэлэлцсэний дараа Монгол Улсад төрийн айлчлал хийхээр Улаанбаатар хотод хүрэлцэн ирлээ.
Ли Жэ Мён НАТО-гийн дээд хэмжээний уулзалтын үеэр НАТО-гийн Ерөнхий нарийн бичгийн дарга Марк Рюттетэй уулзаж, тус эвсэлтэй суурь худалдан авалтын хэлэлцээр байгуулах хэлэлцээг эхлүүлэхээр тохиролцсон байна. Энэхүү хэлэлцээр хэрэгжсэнээр БНСУ-ын батлан хамгаалах салбарын компаниуд НАТО-гийн хамтарсан худалдан авалтын зах зээлд оролцох институцийн үндэс бүрдэхээр байгааг албаныхан онцолжээ.
Тэрбээр мөн НАТО-гийн Батлан хамгаалахын аж үйлдвэрийн форумд үндсэн илтгэл тавьж, БНСУ болон НАТО-гийн хамтын ажиллагааг зөвхөн зэвсгийн худалдаагаар хязгаарлахгүйгээр хамтарсан судалгаа, хөгжүүлэлт, үйлдвэрлэл, ашиглалтын түвшинд хүргэх "Батлан хамгаалахын аж үйлдвэрийн түншлэл 2.0" санаачилгыг дэвшүүлсэн байна.
Түүнчлэн НАТО-гийн уулзалтын хүрээнд Ли Жэ Мён Норвегийн Ерөнхий сайд Йонас Гар Стөре, Украины Ерөнхийлөгч Володимир Зеленський зэрэг удирдагчидтай хоёр талын уулзалт хийж, аюулгүй байдал болон олон улсын хамтын ажиллагааны асуудлаар санал солилцжээ.
Ийнхүү хоёр өдрийн НАТО-гийн дээд хэмжээний уулзалтаа өндөрлүүлсний дараа Ли Жэ Мён Монгол Улсад хүрэлцэн ирсэн бөгөөд Монгол Улсын Ерөнхийлөгч У.Хүрэлсүхтэй албан ёсны хэлэлцээ хийж, хоёр улсын харилцааны шинэ "алтан үе"-ийг эхлүүлэх, газрын ховор элемент, нийлүүлэлтийн сүлжээ, худалдаа, хөрөнгө оруулалтын хамтын ажиллагааг өргөжүүлэх асуудлыг хэлэлцэх юм.
.jpg)
.jpg)
