АНУ-ын Ерөнхийлөгч Д.Трамп есдүгээр сарын 29-нд Цагаан ордонд технологийн томоохон компаниудын удирдлагуудтай уулзаж, хиймэл оюун ухааны салбарт төрөөс хатуу зохицуулалт хийхийн оронд компаниуд өөрсдөө хяналт тавих зарчмыг дэмжсэн байна. Мөн тэрээр хиймэл оюун ухааныг “Супер оюун ухаан” буюу “SI” гэж нэрлэх болсноо мэдэгджээ.
Уулзалтын үеэр OpenAI, Google, Meta, Anthropic, Nvidia зэрэг компанийн удирдлагууд оролцож, хиймэл оюун ухааны аюулгүй байдлыг хангах, компаниудын дотоод хяналтыг сайжруулах, хараат бус аудит хийлгэх тухай сайн дурын тохиролцоонд нэгдсэн байна. Гэхдээ уг тохиролцоо нь хуулиар заавал биелүүлэх үүрэг хүлээлгэхгүй аж.
Уулзалт хиймэл оюун ухааны эрсдэлийн талаарх анхааруулга нэмэгдэж буй үед болсон байна. Anthropic компани IPO-гийн танилцуулга баримт бичигтээ өөрийн AI загварууд хүн төрөлхтөнд сүйрлийн хэмжээний аюул учруулж болзошгүйг дурдсан тухай Reuters мэдээлжээ. Харин Д.Трамп хиймэл оюун ухааны хөгжлийг хэт хатуу зохицуулалтаар сааруулах нь АНУ-ын технологийн өрсөлдөх чадварт сөргөөр нөлөөлнө гэсэн байр суурь илэрхийлсэн байна.
CNN/SSRS-ийн санал асуулгаар америкчуудын 75 хувь нь хиймэл оюун ухааныг айдас, түгшүүртэйгээр хүлээн авч байгаа бол 71 хувь нь холбооны засгийн газрыг уг салбарт илүү идэвхтэй зохицуулалт хийх шаардлагатай гэж үзжээ. Энэ нь Трампын дэмжиж буй салбарын өөрийн зохицуулалтын бодлого олон нийтийн болгоомжлолтой зөрж байгааг харуулж байна.
Д.Трампын засаг захиргаа хиймэл оюун ухааны хөгжлийг эдийн засгийн өсөлт болон Хятадтай өрсөлдөх чадвартай холбон тайлбарлаж байгаа бол салбарын зарим удирдлага, мэргэжилтнүүд технологийн аюулгүй байдалд төрийн хяналт шаардлагатайг анхааруулсаар байна.
Эх сурвалж: BBC
