Төв аймгийн Алтанбулаг сум, Хустайн нурууны Байгалийн цогцолборт газарт өчигдөр /2026.09.30/ өглөө 9 цаг орчимд баавгай үзэгдсэн дуудлага мэдээлэл малчин иргэнээс Хустайн нурууны хамгаалалтын захиргаанд ирсэн байна.
Ингээд мэдээллийн дагуу байгаль хамгаалагчид ажиллаж байрлалыг тогтоон, холбогдох албаныханд мэдэгдэж, дараагийн шатны арга хэмжээг авчээ. Тодруулбал, БОУАӨЯ, Хустайн нурууны БЦГ-ын хамгаалалтын захиргааны дарга, байгаль хамгаалагчид, Малын эмч Ж.Гэрэлтуяа Амьтан судлаач, холбогдох мэргэжилтнүүд, ард иргэдийг төлөөлөл 10 гаруй хүний бүрэлдэхүүнтэй баг ажиллаж, 23 цагийн орчимд баавгайг унтуулга буугаар нойрсуулж, аюулгүй тээвэрлэн суурьшлын бүсээс гаргах ажиллагааг зохион байгуулсан байна.
Баавгайг унтуулах буугаар нойрсуулсны дараа, нас болон биеийн ерөнхий амин үзүүлэлтүүдийг тогтоон, үс, шүлс, цус зэргээс 3 төрлийн сорьцын дээжийг судалгаа шинжилгээний зориулалтаар авсан байна. Улмаар тусгайлан бэлтгэсэн төмөр хайрцагтай зөөвөрлөн Хан хэнтийн нурууны бүсэд байгальд нь тавих ажээ.
