Хятадын өмнөд хэсэгт амьдардаг Сун Хайян, Пэн Сийнг нар 14 жилийн турш хайсны эцэст хулгайлагдсан хүүтэйгээ уулзжээ. Өдгөө 18 настай Сун Жуо нь 2007 онд дөрвөн настайдаа хулгайлагдсан байна.
Эцэг эх нь хүүтэйгээ дахин уулзана гэсэн итгэл найдвараа хэзээ ч алдаагүй бөгөөд хүүгээ хайхын тулд үл хөдлөх хөрөнгөө зарж, хүүгийнх нь байгаа газрын талаар мэдээлэл өгсөн хүнд 31,000 долларын урамшуулал санал болгож байжээ.
Олон жилийн турш Сун Хайян хүүгээ хайхаар Хятадын бараг бүх бүс нутгаар аялсан гэж Олон нийтийн аюулгүй байдлын яамны цахим хуудсанд мэдээлсэн байна.
Хонконгийн найруулагч Питер Чан 2014 онд түүний түүхээс сэдэвлэн “Хамгийн эрхэм” киног бүтээсэн нь “IMDb”-ийн мэдээллээр 50 сая гаруй долларын ашиг орлого олсон байна. Мөн киноны ачаар Хятадын хүүхэд хулгайлах, худалдаалах гэмт хэрэг олны анхаарлын төвд оржээ.
Цагдаа нар хүүг хулгайлсан хэрэгт Ву Мулонг гэгч этгээдийг буруутган, сэжиглэж байсан бөгөөд царай таних технологийг ашиглаж түүний царайг илрүүлсний дараа алга болсон хүүг зүүн Шаньдун мужаас олсон байна. Хүүг ДНХ-ийн шинжилгээгээр баталгаажуулсан гэж тус улсын хэвлэлүүд мэдээлэв.
Гэмт хэрэгтнийг Суныг оролцуулаад хоёр хүүхэд хулгайлсан хэрэгт холбогдуулан саатуулсан бол Суныг өргөж авсан аав, ээж хоёрыг шүүх хурал болтол батлан даалтад гаргасан гэж цагдаа нэр мэдээлжээ.
Сун хүү төрийн хэвлэлд өгсөн ярилцлагадаа өргөж авсан эцэг эхтэйгээ үлдэх шийдвэр гаргаснаа хэлсэн байна. Учир нь тэд өөрийг нь 10 гаруй жил өсгөсөн бөгөөд тэрээр урьд нь удам судраа мэддэггүй байсан гэв.
Хятадын хуулийн дагуу хүний наймаанд цаазаар авах ял оноодог бөгөөд худалдаж авсан хүмүүсийг гурван жил хүртэл хорих ялаар шийтгэдэг байна. Хятадад жилд олон арван мянган хүүхэд алга болдог. Тус улсын эрх баригчдын мэдээлснээр 2021 онд хулгайлагдсан 8000 гаруй хүүхэд эцэг эхтэйгээ уулзсан бөгөөд Хятадын цагдаагийн асар том ДНХ мэдээллийн сан, нүүр царай таних технологийг ашиглан олон хэргийг илрүүлсэн байна.
