Нийслэлчүүд 10 хоногийн дараа шинэ оноо угтана. Он гарах мөчид Сүхбаатарын талбайд “Улаанбаатарын мөнгөн шөнө” шинэ жилийн цэнгүүнийг зохион байгуулдаг уламжлалтай ч өнгөрсөн жилийн тухайд цар тахлын халдвараас шалтгаалан хийгээгүй. Энэ жилийн хувьд ч төв талбайд олныг хамарсан баярын үйл ажиллагаа хийхгүй аж.
Түүнчлэн төрийн байгууллагынхныг шинэ жилийн баяр тэмдэглэхийг хориглосон Засгийн газрын тогтоол 2021 оны аравдугаар сарын 27-нд гарсан билээ. Дэлхийн Эрүүл Мэндийн Байгууллагаас (ДЭМБ) коронавирусийн Омикрон хувилбарын тархалтаас сэргийлэхийн тулд зарим баяр наадмаас татгалзахыг уриалж байгаа юм.
