Украины Батлан хамгаалахын сайд О.Резников өнөөдөр /2022.03.05/ мэдээлэл хийх үеэрээ, “Оросын арми зарим чиглэлд ахисан боловч Украины хамгаалагчид эзлэн түрэмгийлэгчдийн эсрэг тэмцэж, түлхэн унагаж байна" гэжээ.
Тодруулбал, тэрээр "Мэдээжийн хэрэг, дайсан зарим чиглэлд давшсан. Гэхдээ зөвхөн жижиг газар нутгийг хянаж байна. Манай хамгаалагчид эзлэн түрэмгийлэгчдийг ширүүн сөрөн, түлхэж байна. Тэдний довтолгооны хурд удааширч, Украины эсэргүүцлийн улмаас Орос тактикаа өөрчилж байна. Түрэмгийлэгч өөрийн агаарын болон пуужингийн хүчин чадлаа иж бүрэн бөгөөд идэвхтэй ашиглаж байна. Бүх төрлийн нисэх хүчин манай хот, суурин, иргэний дэд бүтцийг, тэр дундаа чухал дэд бүтэц, аюултай дэд бүтэц, тэдгээрийн дотор цөмийн болон усан цахилгаан станцуудыг бөмбөгдөж байна” гэлээ.
Мөн тэрээр, “Оросын цэргүүд орон сууцны барилга, сургууль, цэцэрлэг, эмнэлгүүдийг онилж байна. "Дайсан сүм, сүмүүдийг сүйтгэж байна. Олон мянган эмэгтэйчүүд, хүүхдүүдийг нүүлгэн шилжүүлж буй төмөр замын өртөөг буудаж байна. Энэ бол айсан жаалуудын арга барил юм. Дайсан амь нас, нулимс бүрийн төлөөсийг төлнө гэдэгт би итгэлтэй байна.
Мариуполь, Волноваха, Харьков, Чернигов, Николаев, Херсон зэрэг хотууд одоогийн байдлаар "хамгийн төвөгтэй" байгаа хотуудын тоонд багтаж байна. Хүмүүнлэгийн коридор ажиллаж, энгийн иргэдийг нүүлгэн шилжүүлнэ гэдэгт бид үнэхээр найдаж байна. Оросын цэргийн хүчний гол хүчин чармайлт Киевийг бүслэх, хот суурин газрын эсэргүүцлийг дарахад чиглсээр байна” гэж мэдэгдлээ.
Эх сурвалж: CNN
