ОХУ-ын Хиагт олон улсын шалган нэвтрүүлэх боомтод автомашин хууль бусаар нэвтрүүлэхийг завдсан иргэн гаалийн ажилтанд 1200 ам.доллар /4 сая гаруй төгрөг/ хахууль өгсөн хэргийн талаар Оросын хэвлэл мэдээлжээ.
Тодруулбал, Казахстаны иргэн нь Монгол Улсаас ОХУ-ын нутаг дэвсгэрт зөвшөөрөлгүй, гаалийн татвар төлөхгүйгээр автомашин оруулж ирсэн бөгөөд гаалийн байцаагчид хахууль өгснийг Буриадын гаалийн авлигатай тэмцэх газар болон ОХУ-ын Холбооны аюулгүй байдлын албаны ажилтнуудын хамтарсан шуурхай ажиллагааны үеэр илрүүлж, хахууль өгсөн этгээдийг Хиагтад саатуулсан аж. Түүнийг ОХУ-ын Эрүүгийн хуулийн 291 дүгээр зүйлийн 3 дахь хэсэгт заасан гэмт хэрэг (хээл хахууль өгсөн) гэх үндэслэлээр эрүүгийн хэрэг үүсгэсэн байна.