Bloomberg News нэгдүгээр сард /2023.01/ эх сурвалжаас иш татан мэдээлснээр, БНХАУ-ын Үндэсний хөгжил, шинэчлэлийн хороо нэгдүгээр сарын эхээр төрийн өмчит дөрвөн аж ахуйн нэгжид Австралиас нүүрс импортлохыг эхний ээлжид зөвшөөрөхөөр төлөвлөж байсан.
Тухайлбал, БНХАУ өнгөрсөн онд 290 сая тонн нүүрс импортолж, дэлхийн хамгийн том нүүрс хэрэглэгч орон болсон. Тэгвэл тус улс анх Австралийн нүүрсний гол худалдан авагч байсан боловч 2020 онд COVID-19 вирусийн гарал үүслийг тогтоох асуудал, Хятадын 5G төхөөрөмж үйлдвэрлэгч Huawei компанийн тоног төхөөрөмж ашигласан болон улс төрийн бусад маргаан зэргээс болж хоёр улсын харилцаа муудсан. Үүнээс улбаалан Бээжин Австралийн нүүрс, дарс зэрэг олон төрлийн түүхий эдэд импортын хязгаарлалт тогтоосон юм. Харин 2022 онд Австралийн шинэ засгийн газар засгийн эрхэнд гарсны дараа Хятадтай харилцаагаа сайжруулахыг эрмэлзэх болсон билээ.
Үүнтэй холбоотойгоор Австралийн Ерөнхий сайд Энтони Албанезе “Хоригийг цуцлах нь хоёр улсын харилцааг сайжруулахад чухал алхам болно” гэж мэдэгджээ.
Хятадын гангийн компаниуд болон цахилгаан станцуудад Австралийн өндөр чанарын нүүрс эрэлт хэрэгцээ ихтэй байдаг. Тус улсын нүүрсний тээвэрлэлт, маркетингийн нийгэмлэгийн мэдээлснээр гуравдугаар сарын /2023.03/ эхний хагаст импортын хэмжээ нэг сая тоннд хүрсэн байж магадгүй юм. Харин “Bloomberg News”-ийн мэдээлснээр БНХАУ Австралийн нүүрний импортод тавьсан хоригоо бүрэн цуцалж байгаа аж.
