“Маттел” компани Мягмар гарагт /2023.04.25/ дауны синдромтой хүүхдүүдэд зориулсан “Барби” хүүхэлдэйг танилцууллаа.
Тус хүүхэлдэй нь “Mattel Barbie Fashionistas” цувралын нэг хэсэг бөгөөд хүүхдүүдэд гоо сайхныг илүү олон янзаар харуулах, бие махбодын хөгжлийн бэрхшээлийг гутаан доромжлохтой тэмцэх зорилготой юм. Өмнө нь “Барби” хүүхэлдэй дунд хиймэл хөлтэй, сонсголын аппараттай, тэргэнцэртэй болон арьсны толбо нь пигментээ алддаг витилиго өвчтэй хүүхэлдэйг оруулж байсан. Хамгийн сүүлийн үеийн “Барби” хүүхэлдэйний хувьд “Маттел (MAT)” Дауны синдромтой хүнийг үнэн, зөв төлөөлөхийн тулд хүүхэлдэйний хэлбэр, онцлог, хувцас, дагалдах хэрэгсэл, сав баглаа боодлын талаар Дауны хам шинжийн үндэсний нийгэмлэгтэй нягт хамтран ажиллажээ.
NDSS-ийн ерөнхийлөгч, гүйцэтгэх захирал Канди Пикард "Анх удаа тэдэнтэй төстэй Барби хүүхэлдэйгээр тоглож чадах манай нийгэмлэгийн хувьд энэ нь маш их ач холбогдолтой юм. Энэ “Барби” нь төлөөллийн хүчийг хэзээ ч дутуу үнэлж болохгүй гэдгийг сануулж байна” хэмээжээ.
“Маттел” компани 64 жилийн түүхтэй “Барби” брэнддээ илүү хүртээмжтэй хандлагыг нэвтрүүлсэн. Гэвч энэ компани охидод бодит бус харьцаатай эмэгтэй хүний биеийн үлгэр дуурайлал үзүүлж байна гэсэн шүүмжлэлд өртөөд удаж байгаа юм. Барби хүүхэлдэй 1959 онд нээлтээ хийснээс хойш хэдэн арван жилийн турш цайвар арьстай, цагаан, нарийхан, шаргал үстэй, маш нарийн бэлхүүстэй, өргөн цээжтэй, өндөр өсгийт дээр үргэлж ганхсан хэвээр байсан. Эцэст нь 2016 онд хүүхэлдэйний борлуулалт багассан тул Маттел шинэ хүүхэлдэйг гадаад төрхөөрөө олон талт болгосноор Барбиг илүү бодитой дүрслэл болгон урласан. Барбиг дөрвөн биеийн төрөл, долоон арьсны өнгө, 22 нүдний өнгө, 24 үсний засалттайгаар дахин танилцуулсан.
