Монголын рок, поп хөгжмийн алтан үеийн төлөөлөл, “Харанга” хамтлагийн ахлагч, гитарчин, Монгол Улсын Урлагийн Гавьяат Зүтгэлтэн Цэнд-Аюушийн Энхманлай агсныг өнөөдөр /2025.05.12/ эцсийн замд нь үдлээ.
Түүнтэй салах ёс гүйцэтгэх ёслолыг "Соёлын төв өргөө"-нд зохион байгуулж, хүндэтгэл үзүүлэх гэсэн олон нийт, уран бүтээлчид цувран ирсэн байна. Түүнийг төрөл төрөгсөд, хамт олон, урлагийн зүтгэлтнүүд болон олон зуун шүтэн бишрэгчид нь сэтгэл гүн эмгэнэлтэйгээр үдсэн юм.
Ц.Энхманлай нь “Харанга” хамтлагийн үүсгэн байгуулагчдын нэг бөгөөд “Шүүдэр цэцэг”, “Замд гаръя”, “Мартагдашгүй хайр”, “Итгэл” зэрэг Монголын рок хөгжимд мөнхөрсөн бүтээлүүдийг туурвиж, олон үеийн залуусын сэтгэл зүрхэнд хоногшсон домогт уран бүтээлч байлаа. Түүний нас барсан тухай мэдээ энэ долоо хоногийн эхээр олон нийтийн сүлжээнд тархаж, урлаг соёлын салбар болон олон нийт гүн эмгэнэл илэрхийлсэн билээ. Ц.Энхманлай агсны уран бүтээл, оюуны өв нь Монголын хөгжмийн түүхэнд үлдэж, үеийн үед дурсагдах болно. Талийгаачийн гэр бүл, төрөл төрөгсдөд нь гүн эмгэнэл илэрхийлье.
