УИХ-ын гишүүн Ц.Анандбазар охид, эмэгтэйчүүдэд бэлгийн дарамт үзүүлсэн, хүчирхийлсэн гэх хэргийг нийслэлийн Прокурорын газрын хяналт дор ЦЕГ-ын Мөрдөн байцаах албанаас шалгаж байгаа талаар бид өмнө мэдээлсэн.
Тэгвэл Мөрдөн байцаах албанаас мөрдөгч нарын бүрэлдэхүүнтэй Ажлын хэсэг гарч, мөрдөн шалгах ажиллагаа явуулж эхэлжээ.
Одоогоор “Цахиур эрэн сурвалжлах нэвтрүүлэг”-т оролцон ярилцлага өгсөн гэрч, хохирогч нараас мэдүүлэг авах ажил үргэлжилж байгаа бөгөөд мөн тэдний мэдүүлгийн дагуу холбогдох шалгалтууд хийгдэж байгаа аж.
Нэвтрүүлэг гарахаас өмнө иргэн Б.Сүндэръяа харьяа дүүргийнхээ цагдаагийн газарт өргөдөл гомдол өгч, хэрэг шалгагдаж байсан бөгөөд тухайн хоёр хэргийг Мөрдөн байцаах албанд нэгтгэн, ийнхүү Ажлын хэсэг мөрдөж байгаа юм байна.
Мөрдөн шалгах ажиллагааны хүрээнд УИХ-ын гишүүн Ц.Анандбазараас тайлбар мэдүүлэг авахаар цагдаагийн байгууллагаас хэд, хэдэн удаа дуудсан боловч тэрбээр өнөөдрийг болтол ирж, мэдүүлэг өгөөгүй байгаа гэдгийг эх сурвалж мэдээлж байна. Учир нь Ц.Анандбазар УИХ-ын гишүүний халдашгүй дархан эрхээрээ халхавч хийн, ийнхүү хуулийн байгууллагын шалгалтын ажиллагаанд саад учруулж, цаг хугацаа үрж байгаа аж.
