Нүүрсний хулгайн хэрэгт холбогдсон хүмүүсийн нэрийг зарлаж, хариуцлага тооцохыг шаардсан иргэдийн жагсаал ес дэхь өдрөө үргэлжилж байна.
Тодруулбал, Жагсагчид Сүхбаатарын талбайд гэр барихаар Нийслэлийн Сүхбаатар дүүргийн Засаг даргад хүсэлт тавьсан ч татгалзсан хариу авсан бөгөөд улмаар өчигдөр цахим орчинд эсэргүүцлийн давлагаа өрнөж “Энгийн иргэд үгээ хэлэхээр гэр барьж болдоггүй юм уу?” хэмээн бухимдлаа илэрхийлсэн юм. Үүнтэй холбогдуулан НЭМГ-ын эмч нар суулт зарлаж байгаа иргэдэд үзлэг хийж, талбайн урд хэсэгт дулаан автобус байрлуулсан. Мөн НЗДТГ-аас жагсагчид гэр барих зөвшөөрлийг хотын даргад албан ёсоор хүргүүлбэл талбай дээр биш авто зогсоолд гэр барих зөвшөөрөл олгоно гэсэн юм. Ийнхүү жагсагчид авто зогсоол дээр хоёр гэр барьж эхэлжээ.
