Томуу, томуу төст өвчин буюу амьсгалын замын цочмог хүнд халдвараар 15 хүртэлх насны хүүхдүүд илүү халдварлаж байгааг Эрүүл мэндийн яамнаас анхаарууллаа.
Тодруулбал, улсын хэмжээнд томуу, томуу төст өвчин 59.7 хувьтай /10000 хүнд тооцвол/, амьсгалын замын цочмог хүнд халдвар 4.6 хувьтай байна. ХӨСҮТ-д томуу, томуу төст өвчний улмаас 198 хүүхэд хэвтэн эмчлүүлж байгаагаас 20 орчим хүүхэд уушгины хатгаагаар хүндэрсэн гэдгийг ХӨСҮТ-ийн Дэд захирал Ц.Чинбаяр хэллээ.
Тэрбээр "Хүүхэд нь өндөр халуурч байгаа тохиолдолд заавал эмчийн зөвлөгөөний дагуу асаргаа сувилгаа, эмчилгээг хийх хэрэгтэй. Өнөөдрийн байдлаар ХӨСҮТ-ийн Эрчимт эмчилгээний тасагт есөн хүүхэд уушгины хатгаа, амьсгалын дутагдал, амьсгалын замын бачуурал оноштой хэвтэн эмчлүүлж байна” гэв. Мөн тэрбээр хүүхдээ олон нийтийн газраар авч явахгүй байх, 5 хүртэлх насны хүүхэддээ томуугийн вакцин хийлгэхийг зөвлөлөө.
М.АРИУНАА
