Гурван настай хүү хойд эцэгтээ хүчирхийлүүлсэн байдалтай хүнд гэмтэл авч, ГССҮТ-д хүргэгдсэн хэрэг энэ сарын 8-ны өдөр гарсан талаар бид өмнө нь мэдээлсэн.
Тодруулбал, Баянгол дүүргийн 10-р хороонд ээж болон хойд эцгийн хамт оршин суудаг гурван настай хүү гар болон нуруу нь хугарч, толгойдоо цус хуралттай, ухаангүй ГССҮТ-д хүргэгдсэн байдаг. Зодуулсны дараа хүү ухаангүй байсан бөгөөд гэрт нь гурав хонуулж хэргийг нуун дарагдуулсан гэж буй.
Улмаар хойд эцэг нь хүүг ГССҮТ-д хүргэж ирсний дараа оргон зайлсан байсныг цагдаагийн байгууллагаас шуурхай илрүүлж, мөрдөн шалгах ажиллагааг явуулж эхэлжээ.
Хохирогч хүүгийн биеийн байдал маш хүнд, амьсгалын аппаратанд байгаа бөгөөд эл хэрэгт хүүгийн төрсөн эх Л болон түүний хамтран амьдрагч 34 настай, эрэгтэй Э нарыг шалгаж байгаа бөгөөд тэднийг гэмт хэргийн шинжтэй үйлдлийн мэдээллийг цагдаагийн байгууллагаас нуун дарагдуулсан гэх үндэслэлээр цагдан хорьжээ. Эргэн сануулахад, хүүгийн ээжийн хамтран амьдрагч гэх Э нь 3-6 насны хүүхдүүдийг гэртээ харж үлдэхдээ 3 настай, эрэгтэй Б-г зодсон байж болзошгүй нөхцөл байдал урьдчилсан байдлаар тогтоогдсон бөгөөд цагдаагийн байгууллагаас шуурхай эрэн сурвалжлах ажиллагааг явуулж холбогдогч Э-г баривчлан мөрдөн шалгах ажиллагааг үргэлжлүүлж байсан юм.
