Хөгжим хүүхдийн сэтгэл хөдлөл, сэтгэхүйн үйл ажиллагааг идэвхжүүлж, бүтээлч байдлаас гадна мэдрэмжийг нэмэгдүүлдэг. Хамгийн гол нь зөв хүн болж төлөвшихөд чухал үүрэгтэй. Тиймээс Баянзүрх дүүргийн Соёлын ордон, Боловсролын хэлтэс, Нийгмийн хөгжлийн хэлтэстэй хамтран хөгжим тэр дундаа сонгодог урлагаар дамжуулан боловсрол олгох арга хэмжээг өнөөдөр зохион байгууллаа. Монголын отгон оркестр болох “Анир поп оркестр” дэлхийн сор болсон бүтээлүүдийг эгшиглүүлж, хүүхдүүдэд бэлэг барилаа. Баянзүрх дүүргийн 55, 88 дугаар сургуулийн 400 орчим сурагчид энэхүү арга хэмжээнд оролцсон юм.
2023 оныг Баянзүрх дүүрэг “Хүний хөгжил”-ийн жил болгон зарласан. Энэ хүрээнд Баянзүрх дүүргийн соёлын ордноос өнөөдрийн үйл ажиллагааг зохион байгуулж байгаа бөгөөд цаашид хүүхэд рүү чиглэсэн олон арга хэмжээг хийхээр төлөвлөөд байгаа юм. Тухайлбал тус соёлын ордноос хүүхдийн дуулалт жүжиг тавихаар бэлтгэл ажилдаа ороод байна гэж Баянзүрх дүүргээс мэдээллээ.
