Урин дулаан цаг ирж байгаатай холбоотой Баянзүрх дүүргийн хэмжээнд хүүхдийн тоглоомын талбайн ойролцоох эрсдэлийг бууруулах, хүүхдэд аюултай тоглоомыг буулгах арга хэмжээг эхлүүлээд байгаа.
Өнөөдөр 4 дүгээр хорооны Засаг дарга Б.Энхболд хорооныхоо “Солонго-5” СӨХ-ийн даргатай уулзаж хүүхдийн тоглоомын талбайн ойролцоох бетон, хуучин цэцгийн мандал зэргийг аюулгүй болгох шаардлагыг хүргүүллээ.
Мөн энэ үеэр орчныхоо үзэмжид нөлөөлж буй хэрэгцээгүй болсон мухлагийг ч мөн буулгах талаар ярилцаж, шийдвэрлэхээр боллоо.
Хүүхдийн тоглох орчныг аюулгүй болгох арга хэмжээг авахгүй байх нь өөрөө үл хайхрах төрлийн хүүхдийн хүчирхийллийн нэг хэлбэр юм.
Тиймээс хороод болон СӨХ-үүд, иргэд, аж ахуйн нэгжүүдийг ойр орших хүүхдийн тоглоомын талбайн аюулгүй байдлыг хангуулахыг уриалж байна.
