АНУ-ын Майамигийн олон улсын нисэх онгоцны буудлын явах зурвасын уулзвар дээр өнгөрсөн бямба гарагийн оройн 21:15 цагийн орчимд “UPS” компанийн ачааны онгоц болон “Copa Airlines” авиа компанийн зорчигч тээврийн онгоц хоорондоо мөргөлдсөн осол гарлаа.
АНУ-ын Холбооны нисэхийн удирдах газар болон Үндэсний тээврийн аюулгүй байдлын зөвлөлийн мэдээлснээр, Панамын нийслэл Панама хотоос дөнгөж газардаад зогсоол руугаа явж байсан “Copa Airlines”-ийн 427 дугаар нислэгийн (Boeing 737-800NG) зүүн далавчны үзүүр, Колумбын Богота хот руу хөөрөхөөр бэлтгэж байсан “UPS”-ийн 358 дугаар нислэгийн (Boeing 767) ачааны онгоцны хошуу хэсгийг мөргөсөн байна. Ослын улмаас “UPS”-ийн онгоцны хошуу хэсэг ихээхэн хонхойж, том нүх үүссэн бол зорчигч тээврийн онгоцны далавчны үзүүр хугарчээ.
Тухайн үед “Copa Airlines”-ийн онгоцонд 166 зорчигч, багийн зургаан гишүүн буюу нийт 172 хүн зорчиж явснаас хоёр зорчигч хөнгөн гэмтэж, Майами-Дэйд дүүргийн аврах албаныхнаас газар дээр нь анхан шатны тусламж авсан бөгөөд эмнэлэгт хүргэх шаардлага гараагүй байна. Бусад зорчигч болон хоёр онгоцны нисэх багийнхан бүгд эсэн мэнд буужээ. Онгоцонд явсан зорчигч Сезар Феррейра CNN сувагт өгсөн ярилцлагадаа газардсаны дараа гэнэт хүчтэй цохилт мэдрэгдэж, онгоц хажуу тийш огцом шидэгдсэн ч онгоцны үйлчлэгчид шуурхай ажиллаж зорчигчдыг тайвшруулсан хэмээн ярьжээ.
Нислэгийн хөдөлгөөн удирдах төвийн аудио бичлэгээс үзэхэд, диспетчерүүд “UPS”-ийн нисэх багт газардсан онгоцонд зам тавьж өгөхийг зааварчилсан боловч “UPS”-ийн онгоц уулзвар дээр зогсох ёстой хязгаараас хэтэрч зогссон нь ийнхүү мөргөлдөх шалтгаан болсон байна. Ослын дараа “UPS”-ийн нисгэгч радио холбоогоор зогсох цэгээсээ арай хэтэрч зогссоноо хүлээн зөвшөөрсөн нь бичлэгт үлдсэн байна. Нисэх буудлын удирдлагууд бусад нислэгийг өөр явах зурвас руу шилжүүлснээр буудлын үйл ажиллагаа сааталгүй үргэлжилсэн байна. Одоогоор FAA болон NTSB албан ёсны мөрдөн шалгах ажиллагааг эхлүүлээд байгаа бөгөөд урьдчилсан дүгнэлтийг 30 хоногийн дотор гаргахаар төлөвлөжээ. Хоёр авиа компани хоёулаа эрх бүхий байгууллагуудтай бүрэн хамтран ажиллахаа мэдэгдсэн байна.