Коронавирус цар тахлын халдвар авсан иргэдийн тоо сүүлийн өдрүүдэд эрс нэмэгдэж цаашид өсөх хандлагатай байна. Иймд энэ сарын 13-ны өдөр хуралдсан УОК-ын хуралдаанаас халдварын тархалтыг хумихын тулд 14 хоногийн хугацаа /2021.03.15-28/-тай зарим арга хэмжээг авахаар шийдвэрлэсэн.
- 23.00-06.00 ЦАГТ УЛААНБААТАРТ ХӨДӨЛГӨӨНИЙГ ХЯ3ГААРЛАНА-
Тухайлбал, нийслэлд халдварын эрсдэл өндөр байгаатай холбогдуулан хотын дарга Д.Сумъяабазар, ЦЕГ-ын дарга Ж.Болд нарт, “Улаанбаатар хот доторх хүн тээврийн хэрэгслийн хөдөлгөөнийг 2021 оны 3 дугаар сарын 15 –ны өдрийн 06:00 цагаас 3 дугаар сарын 28 –ны өдрийн 06:00 цаг хүртэлх хугацаанд хязгаарлах /эмнэлгийн тусламж үйлчилгээ, буяны ажил, шөнийн нислэг, инженер хангамжийн ажил, тусгай зориулалтын техник хэрэгслээс бусад/” гэсэн чиглэлийг өгсөн билээ.
Энэ дагуу Улаанбаатар хот доторх хүн, тээврийн хэрэгслийн хөдөлгөөнийг өнөөдрөөс эхлэн энэ сарын 27-ны өдрийг хүртэл орой бүр 23:00-06:00 цагийн хооронд /эмнэлгийн тусламж үйлчилгээ, буяны ажил, шөнийн нислэг, инженер хангамжийн ажил, тусгай зориулалтын техник хэрэгслээс бусад/ бүрэн хязгаарлах захирамж хэрэгжиж эхэлж байна. Үүнтэй холбоотойгоор цагдаагийн байгууллагын алба хаагчид яг одоогоор бэлэн байдлыг хангаж ажиллаж эхэлжээ.
