Хууль бусаар ашигт малтмал олборлох үйлдлийг таслан зогсоох чиглэлээр цагдаагийн байгууллагатай хамтарсан хяналт шалгалтыг зохион байгуулан ажиллаж байгаа талаар Байгаль орчин аялал жуулчлалын яамнаас мэдээллээ.
Усны нөөцийн хомсдол, бохирдлоос хамгаалах ажлын хүрээнд ус ашиглан хууль бусаар ашигт малтмал олборлох үйл ажиллагаа явуулж байгаа гэмт хэрэг, зөрчлийг илрүүлж, таслан зогсоох чиглэлээр Туул голын сав газрын захиргааны даргын баталсан удирдамжийн дагуу Экологийн цагдаагийн алба, Булган аймаг дахь Цагдаагийн газартай хамтарсан хяналт шалгалтыг Булган аймгийн Бүрэгхангай сумын нутаг дэвсгэрт зохион байгуулан ажиллаж байна.
Арга хэмжээний хүрээнд 2022 оны есдүгээр сарын 19, 20-ны өдрүүдэд Булган аймгийн Бүрэгхангай сумын “Туулын баруун дэнж” гэх газар хууль бусаар ашигт малтмал олборлох үйл ажиллагаа эрхэлж байсан иргэн Б, О нарын 2 удаагийн үйлдлийг таслан зогсоож хэргийн газрын үзлэг хийж, техник хэрэгслүүдийг битүүмжлэх зэргээр мөрдөн шалгах ажиллагаануудыг газар дээр нь хийж гүйцэтгэн ажиллаж байна.
